Зи ныбжь хэк1уэтам я дунейпсо махуэм теухуа хуэ1ухуэщ1эхэм къриубыдэу мазэ лэжьыгъэ щызэхаублащ Бахъсэн куейм. Жьы хъуам гулъытэ хуэщ1ыныр ди лъэпкъ хабзэщи пщ1э нэмыс ди адэщхуэ — анэщхуэхэм , ди адэ — анэм яхудощ1, гулъытэ хуэдгъэныкъуэкъым. Октябрым и зыр къэрал 1уэхуу, дуней псо мыхьэнэ и1эу ягъэувауэ, дгъэлъап1эми , зэрыхабзэу , нэхъыжьхэм гулъытэ нэхъ хуащ1у, социальнэ 1энат1эхэм мазэ лэжьыгъэхэр ирагъэк1уэк1, дэ1эпыкъуэгъу хуэныкъуэхэм 1уэхутхьэбзэхэр хуащ1эр. Бахъсэн куейм и жылагъуэхэм дэсхэм унагъуэ 1уэху, медицинэ, нэгъуэщ1 социальнэ дэ1эпыкъуныгъэ хуащ1энущ. Псом хуэмыдэу зыщ1агъакъуэнущ ныкъуэдыкъуагъэ зыгъэв, Хэку зауэшхуэ лъэхъэнэм лэжьыгъэ 1энат1э пэрытахэм. Зи ныбжь хэк1уэтам я дунейпсо махуэм теухуа хуэ1ухуэщ1эхэр зэхэзыублар Бахъсэн куейм и щ1ыналъэ администрацэмрэ , Щ1ып1эм щыпсэум социальнэ дэ1эпыкъуныгъэ хуэщ1энымк1э комплекснэ центрымрэ.
Къэбэрдей – Балъкъэрым и л1ыщхьэ К1уэк1уэ Казбек 1э щ1идзащ Хъыбарегъащ1э 1энат1эхэм, социальнэ медиа 1уэхущ1ап1эхэм я лэжьак1уэхэм ахъшэ премия зэрыхуагъэувымк1э унафэм. Лэжьыгъэ нэхъыф1у 10-р ягъэпажэу , зэхэту абы иратынущ сом мин 300. Журналист лэжьыгъэхэм хэплъэнущ телевидение, радио, печать; апхуэдэу сетым щытрадза тхыгъэ купщ1аф1э, нэгъуэщ1 унэт1ыныгъэхэмк1э. Зэхьэзэхуэм ехъул1эныгъэ къыщызыгъэлъагъуахэм ахъшэ саугъэтым имызакъуэу къратынущ Къэбэрдей – Балъкъэрым и 1этащхьэм и премиям и лауреат зэрыхъумк1э дипломхэр. Ар зыхуагъэфащэр къыхэзыхынур Республикэм и 1этащхьэм и нэ1э щ1эту къагъэщ1а Советыращ.
Аруан жылагъуэм и 1эгъуэблагъуэхэм ежьужьк1э зэщ1эк1а щ1ып1эм щрихьэл1ащ Россельхознадзорым Кавказ Ищхъэрэмк1э и Щ1ыналъэ зэхуаку Управленэм и лэжьак1уэхэр. Къэрал инспекторхэм я къэпщытэныгъэхэмк1э , жыг хадэ щагъэк1 щ1ып1эу щ1ы гектар 157 документым къышыгъэлъагъуам щыщу щ1ы гектар 48-р тэмэму зэрахьэркъым. и чэзум зэрамыгъэкъабзам къыхэк1ыу пабжьэм зэщ1ищтащ. 1уэхугъуэхэм ипкъ итк1э ар зи къалэным хыхьэм, щ1ыр зейм хуагъэхьащ ежьужь удзыр гъэкъабзэн, жыг хадэ гъэк1ын теухуауэ къэрал хабзэхэр гъэзащ1энымк1э тхылъ.
Къэбэрдей — Балъкъэрым санитар авиацэмк1э къулыкъу къыщагъэщ1ащ июнь мазэм. « Узыншагъэр хъумэн » лъэпкъ проектым ипкъ итк1э ирагъэк1уэк1 лэжьыгъэр. Вертолетк1э сымаджэ хьэлъэхэр щ1ып1э пхыдзахэм къыщащтэри зэман к1эщ1к1э ди къалащхьэм и сымаджэщхэм къагъэс. Апхуэдэу республикэ клинникэ сымыджэщым и щ1ып1эм щащ1ащ вертолет ет1ысэхып1э. Я мурадщ республикэм и сабий клинникэ сымаджэщым реанимацэмк1э и къудамэм деж вертолет ет1ысэхып1э — телъэтык1ып1э щащ1ыну. Иджы я1эщ 1эмал Iуащхьэмахуэ , бгылъэ щ1ып1эхэм щыIэ район сымаджэщхэм дакъикъэ 45-м къриубыдэу узыфэ хьэлъэ къызэуал1а е фэбжь къызытехуахэр къагъэсыну. Апхуэдэу дохутырхэм я зэф1эк1хэм хагъэхъуащ , вертолетыр медицинэ техникэк1э къызэгъэпэщащи, 1эмалыншэ хъумэ гъуэгу здытетым япэ дэ1эпыкъуэгъу хуащ1эфынущ. Хъыбар къыт1эрыхьамк1э къулыкъум лажьэн зэрыщ1идзэрэ 40 хуэдизрэ вертолетхэм за1этащ, узым къыхигъэзыхьхэр тыншу сымаджэщхэм нагъэсащ.
Урысей ФСБ-м и Къэбэрдей — Балъкъэр Управленэм \ Къэбэрдей — Балъкъэрым и МВД-мрэ Росгвардиямрэ дэщ1ыгъуу оперативнэ – лъыхъуэныгъэхэм ипкъ итк1э щ1ыналъэм къыщызэпаудащ терроризмэм епха 1уэхугъуэ лэжьыныр. Прохладнэ куейм и Солдатскэ станицэм Лениным и ц1эк1э канауэм деж гъущ1гъуэгу зэпрык1ып1эм хуэзэу къащы1эрыхьащ бзэджащ1эхэр лагъым щыщ1алъхьэм. Маф1эгу зек1уап1эр къэзыгъауэн зи мурадхэр яубыдын щыхъум хабзэхъумэхэм 1эщэк1э къеуэн щ1адзат, абдеж т1урик1 щыхагъэщ1ащ. Хъыбарым къызэрыхэщымк1э , бзаджащ1эхэм лагъым къагъэхьэзырам нэмыщ1к1э, я1ыгът автомат, к1эрахъуэ, зэрыуэн шэ . Къа1эрыхьа щ1эпхъаджащ1эхэм языр щыпсэум къыщагъуэтащ лагъымым ирахьэл1э къызэрагъауэ пкъыгъуэхэр, я пэщ1эщ1эгъухэм зэрызэпащ1э 1эмэпсымэхэр, абы я мурадым щыхьэт техъуэ тхыгъэхэр. Къыщнэмыщ1ауэ яубыдащ абы я гупым хэт ц1ыхухъур. Щ1эпхъаджагъэм теухуауэ уголовнэ 1уэху зыбжанэ къызэ1уахащ.